Hikayat Sidom

Source Image


Oleh : Ilyas Ismail

Alhamdulilah loen puhphon kalam
Saleum keu rakan dusun ngen kota
Hikayat sidom loen neuk keumarang
Kisah tauladan beujeut keu peunawa

Bah sidom baet didalam umpung
Na sidom apui dicong bak pala
Cukop sosial sidomnyan madum
Bak peugoet umpung sama kereuja

Rahasia Allah nibak binatang nyan
Mandum berteman sabe sibangsa
Leumpah sosial nibak sidomnyan
Sesama rakan hantom meudawa

Pakar- pakar dunia kaleuh jipeugah
Sidom meutuwah cerdik lagoeina
Rasa dermawan galak seudeukah
Makanan bak babah ji bagi sama

Dalam tuboh jieh na saboh kantong
Teumpat ji peusom makanan dumna
Makanan han abeh sinan di peusom
Jibagi keungen mandum seureuta

Sifeut seurakah hana bak sidom
Saleng menolong sabe sebangsa
Hana meubeungeh sesabe sidom
Na gotong royong jipeugoet desa

Sidom na jieh teunget lam umpung
Meusapat mandum sanak saudara
Uroe ngen malam teunget na lhee jeum
Tapeukaru umpung sidom pih jaga

Sidom keureuja na diluwa umpong
Jimita umpeun pue-pue nyang suka
Kadang ji teumee kue meusareung
Puwoe lam umpung ji bagi rata

Keureuja saban dum sidom saree
Adak ngen mate bangke pih jih ba
Jigulam sama jipuwoe bangke
Asai bek na le teuthiek lam donya

Kehidupan sidom sinan na dalam kisah
Masa Nabiyullah Sulaiman geumat kuasa
Dalam Al- Quran surat An-Naml ayat 18
Sidom guyue minah bek ji gilhe le tentra

Hikayah sidom beujuet tauladan
Sifeut makhluknyan tacok peunawa
Bek ban jikap saket bak badan
Umpung tasiram tatoet ngen suwa

Kuasa Allah geupeugoet binatang
Rahsia alam deuh tangieng nyata
Jeut tacok contoh atau teuladan
Hudep beusaban saleng meujaga

Hudep lam damei beu sapue padan
Bek le hai rakan pake ngen dawa
Saleng meubantu keureuja saban
Jak mandum rakan ta meusaudara

Tamse sidom bak tameurakan
jitem jak sajan oh watee papa
tulong meunulong sesabe rakan
adak bak jalan seleum ji baca

Etnoe keuh dilee Hikayat Sidom
Nibak laen lom tasambong teuma
Nyang goet neucok lam brok neusom
ban sifeut sidom hudep memakna

Idi, 2012

Please Follow Me in Steemit.com

Leave a Reply

Your email address will not be published. Required fields are marked *